احبائي واهلنا الكرام 🌺🌺
عاده خاطئه وخطيرة وفي بعض الاحيان قاتله انها الابرة الكارثيه (الابره الخبط)...
🔴الابره الخبط خطأ تستخدم
🔴استخدام الابره الخبط خطأ
🔴خطأ استخدام الابره الخبط....
🔴لازم نعرف حقيقه .... اغلب الامراض الي تصيب الجهاز التنفسي (كالزكام) وغيره هو التهاب فايروسي .... وليس بكتيري ... اخواني ركزولي على هالنقطه ....
🔴تجينا حالات نشوف شخص ماخذ ابرتين خبط (مثل الديكادرون والفولتارين) وفي بعض الحالات ثلاث ابر خبط(الديكادرون والفولتارين والسيفترياكزون)....
🔴احبائي نفصلها وحده وحده ورح نعرف شنو الي دنسوي بنفسنه من دناخذ هذني الابر :
🌳السيفترياكزون : ابرة مضاد بكتيري... معروفه بالابرة ام ال 1000 ... يعني تقتل البكتريا فقط ...و مثل مكلنا 90 % من امراض الجهاز التنفسي في الشتاء فايروسيه يعني اني كانما اي علاج مماخذ ... وضارب ابرة رح تضرني باعراضها الجانبيه ومتفيديني ....
🧨نخلي بالنا نقطه مهمه .. اني كل ما اضرب هاي الابرة .. رح اخلي البكتريا تنتج نوع جديد يقاوم مفعول الابرة ... يعني لا سامح الله اذا احتاجيت عمليه بالمستقبل ويسجلولي هالابرة دكوم متمضي بجسمي لان البكتريا اصبحت مقاومه للابرة ....
🧨هوايه تقارير تتحدث عن موت الالاف من الناس في المستقبل بسبب وجود البكتريا المقاومه الي نتجت من الاستخدام الخاطئ للمضاد الحيوي ...
🧨وكلنا نعرف من ننصاب بالتهاب بكتيري ... الطبيب يكتبلنا كورس ابر من 3 او 6 ابر حسب الحاله ... اعتقد هذا اكبر دليل يخلينا نعرف ان استخدام ابرة السيفترياكزون الواحده لا فائده له في هذه الحاله ...
🧨بعض الحالات يقرر الطبيب وصف هذه الابره ... حتى يمنع من حدوث الالتهاب البكتيري مع الفايروسي ...
🌳الديكادرون والفولتارين: ... اخواني كل ما نستعمل هاي الابر على المدى البعيد .. من الممكن ان تحدث قرحه الجهاز الهضمي الحاده ... واحتمال تصير قرحه نازفه فجاة... الفولتارين وحده من اعراضها الجانبيه القرحه والديكادرون وحده من اعراضها الجانبيه القرحه... اتخيلوا ويايه اذا استخدمناها سويه شنو الي رح يصير...
طبعا مو بس القرحه .. عدنا السكري .. ارتفاع ضغط الدم .. تنخر العظام ...
🔴لازم نعرف شغله وهي هاي المهمه ... كل علاج ويا مواد مضافه اخرى ... نسميها المواد الغير الفعاله ... هاي المواد تنطي طعم ولون مختلف للدواء ... فنلاحظ مثلا نفس الادويه بس مختلفه بالطعم واللون .... ملاحظين مرات شخص ضارب ابره معينه وممسويه عنده مشاكل او حساسيه... ونفس الشخص يضرب نفس الابره بعد فتره ويصير عنده تحسس ؟؟؟؟
هذا كله بسبب اختلاف المواد الغير الفعاله للعلاج بين شركه ادويه واخرى ... يعني يا اخي الكريم انت ضربت هالابرة الخبط ومشت وياك وعبرت سلامات.. .. احتمال الابرة الخبط الي تضربها مره ثانيه تكون من شركات ادويه مختلفه وتتفاعل المواد الموجوده بالابرتين مع بعضها وبالتالي تسويلك مشكله واحيانا الوفاه لا سامح الله..
🔴حالات هوايه شفناها في حياتنا العمليه ناس دخلوا للانعاش الرئوي وفي بعض الحالات الموت المفاجئ بسبب الابرة الخبط .... للاسف هوايه ناس تستخدمها ومدتعرف شنو المساوئ الي تنتج منها ... ان شاء الله الرساله وصلت ..
حفظكم الله برعايته وسلمكم 🌺🌺🌺
د.اسامه فلاح حسن
إستشاره طبيه
بيج طبي لمساعدة الناس وللاستشارات الطبيه
