مساء الخير حين يكتب الله لزهرة أن تُزهر بداخل صخرة صلبة ستُزهر ،وحين يشاء يغلق باباً ويفتح أبواب ،كن راضياً وكأنك تملك كل شيء🌱🍃
📌 هناك جدل بين الناس ما هو الأفضل للبشرة الماء البارد أم الماء الساخن او الدافي وبدورنا راح نتكلم اليوم عن هذا الموضوع ونشوف شنو الفوائد شنو الأضرار لكل واحد بيهم ؟!🤔
💧 يعتبر الجلد من أهم الأعضاء في الجسم التي تحافظ على درجة الحرارة داخل الجسم فبالتالي اذا الجلد تعرض لحرارة عالية راح يحاول يفقد حرارة شكد ما يگدر وإذا تعرض إلى حرارة قليلة راح يحاول يكتسب حرارة شگد ما يقدر وعندما يتعرض لدرجة حرارة عالية فالأوعية الدموية الموجودة في الجلد راح تتوسع بشكل ملحوظ و كمية الدم التي تضخ للمكان تزيد وبالتالي نسبة الأفرازات الدهنية والتعرق بتزداد بشكل كبير وهذا الشيء يخلي الجلد مشدود اكثر ويكون رطب أكثر وصحي اكثر ومناعته عاليه وبالتالي يكون أقل عرضة للجفاف أو تشققات او التجاعيد .
💧وبالرغم من هذا الكلام توجد سلبيات للماء الحار و الدافي منها توسيع المسامات ولكن إذا تعرض الجلد إلى درجة حرارة منخفضة راح يصير العكس فالأوعية الدموية تتقلص وكمية الدهون في الوجه تقل وكذلك سمك الجلد يقل بعض الشيء والرطوبة والدم الافرازات سواء العرقية أوالدهنية سوف تقل بشكل كبير وهذا ممكن يعرض الجلد إلى جفاف وتكون مرونة الجلد اقل من الطبيعي فيكون عرضه للتشققات و التجاعيد لو استمر هذا الشيء لفترة طويلة بس طبعا بالمقابل المسامات شكلها راح يكون أفضل بكثير .
💧ولأن الموضوع بالحالتين فيه مميزات وعيوب فهذا يخلي الناس حايرة وما تعرف شنو لازم تسوي وتسمع نصائح سوي هيج او سوي هيج وما تعرف منو الصح ومنو الخطأ أما إذا واحد سألني ما هو الأفضل يستخدم الماء الحار او الماء البارد للبشرة
راح أگله حسب الماء اللي اريد استخدمه لاي جزء من الجسم رايده وحسب طبيعة الجلد دهنية او جافه .
💧فلو كان استخدامي للماء مثلا لغسل اليدين او القدمين فاشوف انه الماء الحار والدافي راح يكون أفضل بكثير من الماء البارد لزيادة الترطيب اما لو راح استخدام الماء على الوجه فهذا يعتمد على نوع بشرتي و شنو أني اللي محتاجه اكثر للبشره يكون بها نظارة وحيويه وتدفق للدم اكثر و إفرازات أكثر و ترطيب اكثر طبعا لازم استخدم ماء حار راح يكون أحسن بكثير للبشرة لكن لو إني أعاني من توسع بالمسامات مع افرزات عالية بالدهون فالأحسن أن استخدم المال بارد او حتى استخدم الثلج امشيه على الوجه من أجل أن يبرد البشره ومن اجل أن تتقلص المسامات قدر الإمكان .
💧 لكن نخلي ببالنا لازم نستعمل مرطبات خاصة بالبشرة الدهنية باستمرار من أجل تجنب الجفاف التام وأنا دائما أنصح الناس بالشتاء يستخدمون كريمات مرطبه لأن برودة الجو راح تسويلي نفس تأثير الماء البارد اللي تكلمنا عنه قبل شوية ..
معلومة اليوم قد تكون صغيرة لكن اظن أنها مفيدة الكثير من الناس من أجل أن يكونوا فاهمين شلون يتعاملون مع بشرتهم شنو طبيعة الماء اللي ينفع بشرتهم .
الدكتور ياسر الشمري
دكتوراه بورد اختصاص في الامراض الجلدية والحساسية وتجميل الجلد
تدريسي في الجامعة العراقية
====
إستشاره طبيه
معلومات عن مختلف الأمراض وعلاجها
