الجمعة، 19 فبراير 2021

#داء_الباقلاء

مسائكم خير 
#داء_الباقلاء 
موضوع داء الباقلاء ( لطفا لا تسموه حساسيه الباقلاء لأن هي مو حساسيه ) 
اعرف هو غير واضح الملامح بالنسبه للكثير منكم 
راح احاول أبسطه هنا بطريقه الاسئله و الاجوبه حتى تشاركوه حتى يوصل للكل 

😢 شنو سبب داء الباقلاء؟ 
داء الباقلاء ناتج عن نقص انزيم اسمه G6PD و ينتقل وراثيا 
و يصيب الذكور أكثر من الإناث 
😢 شنو أعراض داء الباقلاء؟ 
تعب و نحول مفاجيء لان يتكسر الدم بسرعه الادرار يصير احمر و يشبه الشاي و ممكن يبين عند المريض أعراض ابو صفار 
😢 هل من الممكن فحص هذا الانزيم بالمختبر ؟ 
اي نعم ممكن بس كوله لأبو المختبر تحليل داء الباقلاء 
او G6pd assay 
😧 زين هو انزيم نقص ليش من يأكل بإقلاء أو نبك أو يشتم حنه يصير عنده تكسر بالدم؟ 
السبب انه هذه الاغذيه بيها عوامل مؤكسده هذه العوامل راح تأكسد خلايا الدم و بسبب النقص بهذا الانزيم تكسر خلايا الدم و يصير عنده فقر دم للطفل و ادرار لونه مثل البيبسي أو احمر لأن تكسر الدم راح يخلي الكريات المكسورة تعبر الكليه و تنزل بالإدرار 
😢 زين دكتور ابني أكل العام باكلا و كلشي ما بيه بس السنه أكل باكلا و صار عنده تكسر ليش؟ 
اختي الكريمه اكو بحدود 300 فصيلة من أنواع الباقلاء ممكن هذه الفصيلة تسويله تكسر و الفصيلة الأخرى ما تسويله فهذا هو التفسير 
😧 زين اني ابني ما انطي باكلاء إلى عمر 6 سنين و هيجي أكون حميته مو دكتور؟ 
لا امي داء الباقلاء مرض وراثي ماله علاقه بالأعمار ممكن يصير عنده تكسر بعمر 6 سنين 
خايفة من المرض سويله تحليل لأبنك و وكليه باكلا 
😧 دكتور ابني حبيبي صار عنده تكسر بعمر سنتين و هسه صار عمره 12 سنه يصير انطيه باكلا ؟ 
الجواب لا لأن هذا الانزيم ينقص بكل العمر 
😴 دكتور شنو هالحجي الغلط ابن اختي من كان عمره سنتين صار عنده تكسر و هسه كلشي ما بيه كلشي يأكل و ما بيه شي ؟ 
اختي الكريمه اذا فعلا كان المرض الأول تكسر فهسه اللي صار يا أما الباقلاء اللي دا ياكلها مو هي النوع اللي تسوي تكسر أو كميه الدم اللي تتكسر مو كبيره بالمقارنة مع اللي كان يتكسر يعني تعرفين هسه كميه الدم عنده أكثر بهوايه مما كانت 
بالمناسبه ما تتخيلون اني شكد شايف كبار و عدهم تكسر بإقلاء 
😬 الباقلاء الخضرة لو اليابسة تسوي تكسر ؟ 
الإثنين امي و ارجع و أؤكد يعتمد على نوع الفصيلة
ما يعتمد ابدا على الباقلاء مستويه او نيئه او معلبه 
😢 ممكن ريحتها تسوي تكسر؟ 
اي ممكن 
😧 زين هسه اني دخت انطي لابني لو ما انطي؟ 
إذا عدكم واحد من خواله أو خالاته مصاب بداء الباقلاء و ما تريدين تسوين تحليل خلص لا تنطيه 
اذا ما متوازية ع الباقلاء لا تنطيه 
اذا تريدين تنطيه و شاكه و تريدين قلبك يطمئن سوي التحليل و انطيه وراها
😴 سؤال آخر بنتي صار بيها داء الباقلاء و احنا كلنا نأكل باكلا و عمامها و خوالها بس هي صار بيها ليش؟ 
طفرة وراثية ممكن هي السبب 
😲 دكتور ممكن يكون مميت؟ 
طبعا ممكن يكون مميت لأن ممكن نسبه الدم توصل إلى مستويات قليله جدا 
🙄 ممكن فحصه بالغربله ؟ 
في بعض الفحوصات نعم 
الغربله اللي نسويها ببغداد ما شامله هذا الفحص 
في حين الغربله اللي تسويها المختبرات الاهليه تشمل هذا الفحص فاستفسر من المختبر اللي تسوي يمه الغربله 
.
.

د. سيف سمير البياتي
اخصائي طب الأطفال



إستشاره طبيه
بيج طبي لمساعدة الناس وللاستشارات الطبيه

ليست هناك تعليقات:

إرسال تعليق